GRAWNG RHAWM KEUD KAWN PUI:

          Ex kawn pui:, daing haoh hun ceu:, piang haktiex, mawh kheu tang lox, kawn pui: tom lih: tix koe ceu: pui: mawx ceu: pui: an, kaux hak, nex nham kawn pui: sidu: awm paox:tix.

          Ex kawn pui: ku: ceu:, chix muh chix koeng:, chix gaux:rhawm chix laux:rhawm, tawng: tix lhat krax saux: krax yum: awm paox:.

          Ngai jhak rawm jhim kawn pui: mawh pa daox am tite:, chix tawng: tix krai: lox mhawm mai lox ang mhawm, chix tawng: tix nghiet lox mhawm mai lox ang mhawm.

Ex kawn pui: koe simex:, sibun (2) ceu:, viang: ex tang ceu: pui:, krax muh rhawm pui:, sidu: awm paox:tix, chix muh rhawm mex: moeng paox:tix, pui: mhawm grang:, ang mhawm grang: koe rhawm muh ku: kaux.

Kaing Ting:

Krax Lawng: ex kawn pui: koe ngie: (2) nyaing:
Koe daux krax pa riang: mai daux krax faik

Ai Rang

GRAWNG HAKTIEX VAX (PRAOG)

          Jauh: 1989-4-17 hoek 1999-4-17, baux: 2-5 Num:, Haktiex Vax (Praog), Ot baux: been: yien yawg daux 10 num:, yuh: Bang Kum Ting: Veng: Pang Kham.

          Haktiex Vax (Praog) plak taoh: - plak caw: koe 30000 mheen rob glak, kaux pui: koe 600000 shien mheen kaux, koe pui 16 ceu: haoh, koe 4 mu kaung, 27 mu veng:, haktiex Vax (Praog) mee mai haktiex hawx, shiem, Man:, Thai Mai Lao.

         Bawgyam: yien yawg daux 10 num:, hoik pon: kaung krax luli: 3000 rheng glak, sawn pui: kaung krax luli: tix glak 2500 kaux, sawn pui: kaung krax khawm uik, koe pui: 750000 shien hoik pon: tawm: simaox: daux krax 750 glak, son: tix glak tawx ngawh: mau: hawx 95000 phak.

Ai-vax (2015-8-29)

GRAWNG TOI KIEX LAG

           Yam: jauh: didix:, lag kiex toi, mawh: paoxgrawm: mhawm ot tau:, yam: an, hauk lag kiex toi paing: awm paox:, daux tix: ngaix:, kiex hak paox: tix lai bix, mhai riang: hauk paox: tix mhawm preeh:.

          Lag jauh: tix mhai hauk toi, khaix hoik mhai lag hauk Toi preeh:, sidaing mhawm grang:, Toi caw: tix deeh: mhai hauk lag preeh: mhawm grang:.

          Yam: jauh: toi tix sang mhai hauk lag mhawm preeh, praix: klawng si num:, klang praox ah lox tix ah, pud pud, kiex lhat kah lox klang praox, Toi yaog rawm meug lung:, Klup hieh piang: lag khawm uik, lag lung: hauk khaix, tom ngaix:, lag tom koeng: kah Toi khaix hoek in si ngaix:, pui tom ah bix:, lag kiex toi.

Ai Rang

Lox Jhawm Kab Si ngien: Rang

Yam: kaoh ex khaing si ngien rang

ex kawn: eep pot kiep lhax lai

yam: kaoh ex khaing si gang lih:

ex kawn: ceep pot dai lhax tux:

yam: jauh: khaox tix pang dix: eue

ex hoik mawh: pot rhit tix ngoi:

yam: jauh: rang tix kuah: dix: liex

ex hoik mawh pot moi: tix phung

moi: tix phung daux kawg sigang.

Yam: lai puing ex naing: lhax tux:

mawh: yam: tuh reeig lung: sigang

Yam: lai phlu ex ngu: lhax gix:

mawh: yam: tuh klang ting: simaox:

krai: lao: pui: dee: tu kawn gix

kawn gix tu nyiex: haw loe lhang

mawh: kheu jih naing: man: kix dix:

ex phru phrat yaung: ot tang

mawh kheu blang naing: hawx kix dix:

ex tom pru prang awm tong nex:

Ai Rang

HU NOM JAH

GRAWNG BHAWM PAI AWM

          Bhawm pai awm, chix tieh: tix koe loe pon ceu:, bawgyam: raux chix tieh: tix mawh: pai awm lung: rao: ma, deeh: lih: tix mawh: rawm lhiex, baux: yam: rung:, daux khix 12 deeh: tieh: tix mawh: rawm si mawg, rawm si dap, bawg tix blah, chix lih: mawh: lhiex mu pre.

         Bhawm pai awm, nie: ot hawt rawm grit gra, mai hawt rawm klawng ting:, mai rung:, ex ah rawm si mawg, pon: ngawb ex yaox: paing: rawm si mawg hawt rawm klawng ku: yaong ku: veng:.

         Si ngaix: jhan riang: piang: haktiex, bhawm haktiex mai rawm grit gra si aoh si eet, lih: tix mawh: pai awm rawm si mawg piang: haktiex.

Ai Rang

GRAWNG PAWD LAI: KA SIMIANG:

Son: ...............................              

         -----------------------

         -----------------------

   Tax Simiang

Ai Pleek

Veng: Kru: Naing:

                 Nab yam yung yi pawd lai: kah maix pa mawh: Tax Simiang: 2, 3 Gum:, grawh:grawng Mawh nin.

                Viang: aux tang nyiex: yaong ot khaing maix simiang: tix, haktiex tang dauh, ang aux doh tang rhawm khaing maix.

                Tax Simiang: , mhawm ot maix lie?, phan mawh: aux, mhawm ot dee: ot tix, ku: singaix:, mai aux daing byaong: rhawm ka maix Tax Simiang: ku: singaix:, tawx maix lang ju: pu rhang, nyawm ot si u koe, sijheung, ku: bawg ku: yam awx.

                                   Lox simie daux rhawm aux, mawh: ngie: ding:

                                               Cao pawd lai:

                                               Ai Rang, Veng: ang vax.

                                               2015. 8. 24 ngaix:...

Laoh lhie

Grawng Khiet / Noh

            Hoek baux raux, woe: sang ting: lih: lhiex, ex mhong ah khiet (noh) lox tix hawt rawm dung: ku: dauh ku: dee:, mawh: khiet(noh) pa kok lhiex.

           Yam: jauh: tom khiet(noh) tix guah lih: mawh: rai roh, lung: lule kaing, taix caong: ang nyang: koe, mawh: sidax pa koe, hoik chix loe: rawm hu ku: dauh.

           Bawgyam: ra loe khix, taix caong: jauh: tix koe, ngai, hoik loh tix mawh: khiet(noh) mhawm mhawm, sidax ang lai koe, khaix hoik deeh: loh tix mawh: khiet(noh), deeh: chix phuh chix mo:, hu ot daux tiex dee: leet piang: gawng.

Ai Rang

Grawng Muah: Lih: Mawh: Ox Mex:

Riang Muah Lih: Mawh Mex:

         Daux haktiex veng: tix dauh, koe pui: mhaing tix lhak tix: kaux, ang cu: nghiet lox miex: keeing tix, khaix hoik yum: miex: keeing khaing nawh, nawh sum kawn muah: daux sipeem: prauk nyiex:

        Muah: sum kawn nyawm: an, plaung: lih: tix mawh: gawng mex:, kawn nyawm: an daing daox am ka tite:, daux ju: miex: keeing aux, kix sum ceu: patix, tang kuah: lih: mawh: ceu: an, in singaix:, aux sum muah:, chix lih: tix mawh: gawng mex:, phan yuh: nin, simie: muah: tee grai khaing piang: haktiex.

Been: krax lhak lud ceu: cad tix
Sidaing ting: phit tite:

Lox kab kuad, khaox toe taix, raix toe ju:.

Ai Rang

Gau Tix Ah Lox Vax

KHAW: TIX
-------------------
A: Mawh mawx?
B: Mawh aux .

A: Nawh mawh mawx?
B: Nawh mawh Cao: Ai: Rang

A: Pex hoek tin: yuh pa tix ?
B: Yix hoek tix sawg vai phuk lai kah maix.

A: Sang: vai pex lai tix ka aux?
B: Yix sang: vai phuk lai toe: lai Vax.

KHAW: RA:
----------------
A: Mawh kiex mawx?
B: Mawh miex aux mai: pux bun: aux.

A: Yuh kiex tix?
B: Tauh kiex nghox.

A: Nghox tix?
B: Nghox pid.

A: Ax hu: ma: khaing:.
B: Aux sang: hu: daux kaung:.

A: Maix hu: aux kah hu: nang:.
B: Mhawm:, ax hu: tau.

KHAW: LOE:
-----------------
A: Mawh simex in: mawx?
B: Nawh mawh paox ke: simex aux.

A: Bun: an: mawh pui mawx?
B: Nawh mawh paox ke: bun: aux.

A: Kiex hoek tin: yuh tix?
B: Hoek tix sawg pux aux.

A: Hoik hoek pux maix?
B: Hoik, taug hu: nux.

A: Kiex sawg pux maix yuh tix kah?
B: Hak nawh hu: thawng: riang tau.

A: Thawng: dee mawx?
B: Thawng: daux laih.

KHAW: PON:
-----------------
A: Kaux maix tix?
B: Kaux aux Shiao: Ai: Hang:.

A: Ot nyiex pex dee mawx?
B: Nyiex yix ot Yaong: Soi:.

A: Nyiex pex koe: pui miex kaux?
B: Koe: pon: kaux, mawh keeing: aux, miex aux, pux aux mai: aux.

A: Miex keeing: maix yuh kaing tix?
B: Keeing: aux mawh cao: phat cheu:, miex aux mawh cao: pai: saux.

KHAW: PHUAN:
-----------------
A: Koe: maix miex num?
B: Koe: aux tix nga: num phwan: .

A: Yuh maix kaing dee mawx?
B: Gau aux lai siox shiao:.

A: Gau maix lai Hawx, gau maix lai Vax?
B: Lai Hawx, lai Vax to gau.

A: Ki kaing yuh maix laih:?
B: Kawn: mawh khawm:, ang: awt ki lhaox.

A: Nyawm gau lai koe: miex ding?
B: Koe: ha: sip ha: kaux.

Ai Rang

Gum: Lox Toe

1.   Maix      = Maix bre: priex nyiex mhawm mhawm
2.   Nawh     = Nawh Sidaing cheung khaing paox
3.   Pax         = Pax Nied hu phai phai aw
4.   Kiex       = Kiex hu sawg tix briex: moi:
5.   Pex         = Pex nied hu kuan: sinax gawng:
6.   Kix         = Kix hu ot haktiex yaong pang: (meung: yawn:)
7.   Yix         = Yix hoik gau: lai vax(praog) glawk 4
8.   Ah          = Ah Maix Lai: Haktiex veng: mawx?
9.   Aux        = Aux hu fi veng: ting: pang sang(pang kham)
10. Ax          = Ax hu kok pui: hoek kum lox
11. Yex         = Yex, hu maix ma dee mawx?
12. Tax         = Tax, hoik koe ju: maix miex: num:?
13. Paox       = Paox, hu maix yuh: lah lai: dee mawx?
14. Aik         = Aik, hoik ma kaung thai maix lie?
15. O            = O, hu liag maix tix daux laih?
16. Miex      = Miex: aux hu liag kraung: daux laih
17. Keeing   = Keeing aux hu gau: pui: nyiex: gau: lai:
18. Yiex:      = Yiex: aux koe ju: (90) num:
19. Ai          = Ai Kap hu yuh: lai: krag veng: man ton
20. Yex        = Yex Kap, hu coh: pliex laih mang shang
21. Yuh:      = Yuh: maix kaing: patix lie?
22. Ble taix = Sinax yaong nong koe miex: taix?
23. Sum      = Sum nyiex: yaong mhawm mhawm
24. Tawm:  = Tawm: sibauk kaux cong
25. Tawx    = Tawx kru: naing: pau: tab mhawm
26. Teei:     = Teei: phuk lai: sau daux bau
27. Cox      = Cox nyiex: sum maix kaux cong
28. Paw:     = Paw: yuh: kaing: ang khaw ang caw:
29. Teem    = Teem Coi: paox: tix yuh: kaing: jhaw

Baox Rhuad: Ai Rang >>>> Nom Jah

Vawng: Haktiex Vax (Praog)

Tax Log Pang

Kru: Naing: Been: Robrom Haktiex Vax (Praog), Mawh: Kru: Naing: Keh Khaing: Miex: Keeing Pui: Haktiex, Caw: Tix Moh Rhawm Miex: Keeing Pui: Meung:.

Kraung: Naing: ex mawh: son: sang priex rien: haktiex nyiex: yaong kaux cong, ang mawh: kraung: naing: hu sawg tix yuh: con: cam tud rhim mau: khri kawn pui:.

Kru: Naing: Robrom: haktiex vax(praog), koe pui: ku: ceu:, grum:rhawm grum:rhi, gau krax lhak haing mai paox:tix, ang guah: ceu: pui: haktiex, ang guah: cubcaw been:li, caw: tix ot greem been: Kru: naing: haktiex vax (praog).

Haktiex nyiex: yaong ex, ang pon: tawx daux taix pui: koeng:, dawg mawh: haktiex tax du: ex dix:

Baox Rhuad: ai rang

Grawng Khix Khraox

        Sinax haktiex mai: khix koe 384,401 glak, rhawm keud pui ang nyang: sax gau: lai:, yam: jauh: khix tix haok tix: sawm hoek kao sawm, pui: keud khix kaoh khaing pak klip singaix:, deeh: laig mai gawng:.

        Plak haok khix sivawg, veeh: tix pak lih:, pang khix 15 ngaix:, khix mhawm riang: kah ex haktiex pak lih:, deeh: caw: tix yeet faik kah haktiex pak klip, phan khix pang mhawm riang: kah kix haktiex pak klip, deeh: caw: tix yeet faik kah ex haktiex pak lih:, ex ah jee: khix, yeet khix, pang khix.

        Kheu lule haktiex, singaix: lai loh tix jhan riang: piang: haktiex yuh: nin, yam: yeet khix, deeh: haok khix kao sawm, mawh: kheu hawt khix haktiex, ex ang lai chix yaox khix, kheu ting: riang: singaix:, phan singaix: laig mai: gawng: ex tom jauh: yaox: khix khraox, phan khix jee: sang yeet, sivawg deeh: veeh: tix pak klip.

Ting Buan Son (Ai Rang)

GRAWNG SI NGAIX:

          Singaix: mai Haktiex koe sinax 150, 000, 000 (tix: lin: phuan lan:), singaix: jhan riang: hax khaing ngu:.

          Ex kawn pui: keud singaix: iak khaing haktiex, singaix: ting: khaing haktiex ti te:, pui: lhak haing meung ting:, hoik chix thawng tix yaox: singaix, haktiex, khix, sim uing ot daux rao: ma awm paox:.

          Singaix: tawx bhawm riang: si-u son: ex kawn pui: mai tosat, khaox ox, rib riem: ku: ceu, tom chix imju: , haok huan piang haktiex.

          Singaix: jhan riang: hax si-u, rob bhawm si-u mau: khri greem haktiex, deeh lih: mawh: pai awm, rawm lhiex, rawm klawng tom pon: tix lih: piang haktiex ku: gawng: ku lua:.

Ai rang

Grawng Gaox Nghox

         

Gaox Nghox mawh: pa eei ju: ex kawn pui:, caw tix ih Gaox nghox ku: ngaix, khaix an, kawn: yuh: lah lai: son: krax haok huan Mau Khri.

          Di: dix:, kawn pui: yuh: ma, shao: baug, shao: moi: krag thai ma kaung, sum nghox khaix, phan simie: nghox tix: glawm, pon: teei: ngie: to nghox 30 glawm.

         Phao in, kawn pui: shao: cag rhiem, thai ma kaung, sum nghox khaix, phan sum simie: nghox tix: glawm, deeh: pon: teei: to nghox 300 glawm.

         Phao in, krax ot kawn pui: hoik koe krax haok huan, Cubcaw plak thung bung kaing: jhaw ku: Meung, hoik thung gau: kawn pui: sum simie: nghox kab son: sang kub ih kawn pui: Gaox piang: haktiex.

Airang

Loh Cao Kaing Tix Blah Daux Kaung Meung Leen

佤语新闻2015.8.11_(new)—在线播放—优酷网，视频高清在线观看

Sitang Meung Vax, Krai Grawng Loh Cao Kaing Tix Blah Daux Kaung Meung Leen, 2015.8.11

Gau lox lai Vax: Ceu To Sat

Gau lox lai Vax: Ceu To Sat

Ceu To Sat

Ceu: To Sat

Piang haktiex in, tu tiag koe ku: ceu:, guah: awm in plak greem.

1. Pa ot piang tiex
2. Pa ot daux rawm

Can Pa ot piang: tiex, Mawh: Sang, Sivai:, Sivai: Sangsi, Krag, Moi:, Lig, Sox, ia, Sim ku: ceu:, Si uing, poh, cak, khaix an, pa ot kapiang: tiex in, kawn koe ku: ceu:.

Can: pa ot daux rawm, Mawh: Kax, Tam, Tam kax, Hoi lheu khaing ankix, kawn: haoh hun ku: ceu: Mai Pa Chix pu, Chix Mo: Chix Hu, koe tom nie ceu:.

www.ai-vax.blogspot.com

Grawng lai paoxgrawm

Son --------------------

Paox:grawm Aux

Ai             Lang

Veng: Meung Pawg

              Aux pa mawh: paoxgrawm maix, nab yam tawx lai: kah maix 1-2 gum:, nyawm: ot maix lie?, phan mawh: tokaux aux, mai daux nyiex daux ma yix, hoik nyawm: ot ku: kaux.

             Yam: in, aux Gau: lai Vax, glawk 1, son sang pon: haok aux daux glawk 2, aux sau riang: tix phat lai: sijheung, aux simie maix sau riang: tix phat lai: ku: bawgyam:, son sang pon: haok maix daux glawk 3, bawgyam ang chix krox ex kawn pui:.

            Lox pa simie: aux tix krai: ka maix, mawh nin, phan ex pluat krax gau: lai: baux rung: praix: sax, ax rieb paoxtix daux kaung moeg nu:, khix (3-20) Ngaix.

                Lox nab yam aux ka maix mawh: ngie: ding:.

          Cao Pawd lai:, Paoxgrawm maix 

(Ai vax)

Kaung moeg nu

2015-8-13  Ngaix...

Kawn doe mai tax cao mi:

               Di: dix, koe kawn doe tix: kaux, Miex: keeing prah moi: kah nawh tix mu. Nawh daing chix priex chix liang moi: an, moi: an tom jiet kluing mhawm. Tax cao mi: yaox moi: an, ngoing kah ti te.

               Koe tix: ngaix:, Tax cao mi: hu fi nyiex: kawn doe, mai ceem (pie:) Lox ah nin, kawn doe eue, moi: in, mawh: moi: pa keh: khaing Brung aux dix:, aux tawx miex: keeing maix vai: jih jiang glang gleeing, phao in, maix caw: tix deeh: tawx kah aux.

             

              Kawn doe mhong lox krai: tax cao mi:, nawh hu kah kuad yaong, mai rawg pui: nyiex: pui: yaong prawng see sinax, pui: nyiex pui: yaong hoik grum: hoek khawm uik, pa ang nyang: hoek, tom mawh: Tax Thoi, kix pui: haoh pui: hun krox jun tax Thoi leeing ngaix:, nawh tom taug hoek ka sang laig si ngaix:.

             Tax Cao Mi:, meet rhawm ka Tax Thoi, mai ah nin, Tax Thoi eue, mawh: miang: mawx, pa kieh maix lha khaix paox:tix. Tax Thoi pawk lox ah nin, mawh kheu jhak aux proe: mhaik, aux tom lha hoek, yam mhong pui: yaong khankix, lox krai: Tax Thoi Grawng proe: mhaig, kix nyawm nyiah: ah ......ha....ha ....ha....Ku: kaux. Tax cao mi: meet rhawm mai ah nin, Thoi pei: Thoi lhien in,  Chix mhaing mhaik proe:, phan maix ang jhi aux yaox: yam in, aux pauh: maix yum:, Tax Thoi deeh: pawk lox ah nin, lud ia dang tix, ang lox Tax Lud glawk, siwoe sang jhi aux maix yaox: proe: mhaik, jah jhi aux yaox: keh Brung maix Moi: ha.

            Tax Cao mi: an, mhong lox pawk Tax Thoi, nawh lhat graung: kah, mawh kheu ang Brung Sax keh: moi: tix: bawg kawx, Kheu jao: lox Tax Thoi, Tax Cao Mi: an, tom ang pon: pie: mab tix ih Moi: kawn doe.

            Ceu: pa ang mawh:, paw: vi: ah mawh:, Ceu: pa mawh paw: vi: ah, ang mawh:, mhaik ang chix proe:, Brung Ang Chix Keh: Moi:....

Awx...Kawn Nyawm Pex!

In mawh glawk Gau Son ...in ngaix...

Laoh lhie Ting Buan Son (TBS)

Aux (Ai Rang)

佤族 中文电影 方言版 wa - chinese movie in wa language

Taix & Gian Taix

1. Taix = 手 (Shǒu) = လက္

2. Gian lang = 中指 (Zhōngzhǐ) = လက္ခလယ္

3. Gian ci = 食指 (Shízhǐ) = လက္ညိဳး

4. Gian ting = 拇指 (Mǔzhǐ) = လက္မ

5. Nghim taix = 指甲 (Zhǐjiǎ) = လက္သည္း

6. Gian tiah = 小指 (Xiǎozhǐ) = လက္သန္း

7. Gian lheh = 无名指 (Wúmíngzhǐ) = လက္သန္းႂကြယ္

8. Jhong taix = 手腕子 (Shǒuwànzi) = လက္ေကာက္ဝတ္

9. Tom taix/ plah taix/ phag taix = 手掌 (Shǒuzhǎng) = လက္ဖဝါး

10. Gob gian taix/ si ang gob gian taix = 指关节 = (Zhǐ guānjié) = လက္ေခ်ာင္းဆစ္

11. Plix taix/ jhawp taix = 拳头 (Quántóu) = လက္သီး

12. Gian taix = 手指 (Shǒuzhǐ) = လက္ေခ်ာင္း

Kied, Jiet = 太 (Tài) = လြန္လြန္း

1. Kied, Jiet

   太 (Tài)

   လြန္လြန္း

2. Kied ting, jiet ting, ting aw:

    太大 (Tài dà)

    ႀကီးလြန္းတယ္

3. Kied iak, jiet iak, iak aw:

    太小 (Tài xiǎo)

    ေသးလြန္းတယ္

4. Kied lang, jiet lang, lang aw:

    太长 (Tài chang)

    ရွည္လြန္း တယ္

5. Kied ngoing, jiet ngoing, ngoing aw:, dawt aw:

    太短 (Tài duǎn)

    တိုလြန္းတယ္

6. Kied vieh, jiet vieh, vieh aw:

   太宽 (Tài kuān)

   က်ယ္လြန္းတယ္

7. (Kied/jiet) kob/ si khob/ si ghob (aw:)

    太窄 (Tài zhǎi)

    က်ဥ္းလြန္းတယ္

8. Jiet dah khaix, dah aw: khaix/ kied lha praix, lha aw: praix.

     太晚了(Tài wǎnle)

    ေနာက္က်လြန္းေနၿပီ

9. Jiet jeng, kied jeng, jeng aw:, koi aw:

    太慢了(Tài mànle)

    ေႏွး လြန္း တယ္

10. Jiet brax, kied brax, brax aw:

     太快了 (Tài kuàile)

     ျမန္ လြန္း တယ္