1989-4-17 Num Jah vax tix cung ka caong cao tix

Pak ngai: hak tiex mai: praix klawng

       Hak tiex meung Vax koe ka daux hak tiex meung Man plak guiex lih singaix. Num singaix pa luan reng num (4500) baux bawg yam ( Kambiriyam), sivoe an mawh hak tiex lon, koe ex tawng yuh nan.( Daw Tin Yi) Hak tiex meung Vax mawh dee ang lung: mhawm koe mai: mawh gawng lua klawng ngawd pa kied nieh koe kah. Ka sinax meung hak tiex plak klip singaix mawh rawm klawng pa ting ceu kaux pa mawh rawm Sikrong.

        Phan mawh rawm Sikrong mawh rawm klawng pa hu sinax gawng lua mawh klawng dee koe simaox tom: nie mai: mawh dee sikhawp, dee raux ang chix tix hu. Hak tiex meung Vax, phan ex jhak ka maox tiag hak tiex, viang caw tix ot dee koek, dee mai kawx, kheu mawh dee koe gawng lua klawng ngawt mai: pon baux bawg yam sikied sitap. Bawg yam pa kied sitap tom: nie, caw tix mawh daux khix 12 mai: daux khix 1. Bawg yam hax, mai, koek praix, viang caw tix mawh ka daux khix 5 mai: khix 6 kawx, kheu mawh dee koe gawng lua tom: nie,ceu pa hax praix, mai, koek khan kix yawm hu. Phan ex jhak plak tiag rawm lhiex koe (50) giien taix mai: (60) giien taix. Bawg yam raux, lhiex praix mawh ka daux khix 5 tom: hoek daux khix 10. Phan mawh daux khix tang dah viang ang mawh tom: nie kawx, ca koe rawm lhiex ceeix ceeix sijheeng. 

Tiag koe jung pui mai: pui ceu ru khan kix

          Ka daux hak tiex meung Vax mawh dee rom pui ku ceu ku ru tix ot tau. Can pui ceu pa ot ka daux meung khan kix, pa mawh Vax, Mien, Shiem, Khang, Kokang, Lisaw, Vax Plang, Akha (Ai Ni), Law Mie, Yui, Miang, Akhie mai: Hang khan kix. 

         Yam in ka daux hak tiex meung Vax, hoik koe ceu pa yien pa yawg mai: krax pa haok huan, mawh kheu nan pui tang dah jah tix hoek ot sipie sipie tau mai: paox tix. Ka daux pui ku ceu ku ru an, ceu pui Vax koe (70%) atix gliah son tix siyieh son. Mai: ka daux pui ru tang ceu mawh Mien mai: Shiem pa nie lheu koe. Can pui ku ceu ku ru an khan kix, mawh pux aik tau mai: paox tix ka daux hak tiex meung Vax mai: mawh krax pa moh rhawm paox tix ot tix tom ngawm tix dia, kaux cong tau mai: paox tix mai: rom tix yuh kaing tau mai: paox tix ka daux hak tiex meung Vax.