Paw nghiet ka lox pa glaw: pa nyaw:

Paw nghiet ka lox

pa glaw: pa nyaw:

        Dix koe gang ting tix gawng, mai: koe: rang: ting tix mu:, kadaux rang: ting an: sivai mai: sang:si: yuh paoxgrawm paox pie ot au mai: paox tix tan: heue. kadaux rang: ting an: sox praix tix mu: pau tix ih priex preem pa haoh khaing: kiex mai: ot dex kiex heue. Tix ngaix, sox praix an: keud kadaux rhawm: tix yuh nin:, son sang yaox aux tix ih nex sivai sang:si mai: sivai, aux sang coh lox mai: kieh kiex khawm: ra: kied paox tix tom: yum heue.

Yam an: sox praix lih ka sivai sang:si mai: chawk ah nin: "simiang sivai sang:si eue:, maix mai: sivai mawh yie simah pax ka paox tix lie?" sivai sang:si deeih ah nin: "yiex ra: mu: mawh paoxgrawm paox pie, mai: ang: sax simah ka paox tix, tix bawgkawx. sox praix paox ah nin: "simiang sivai sang:si eue: tokaux paox grawm maix sivai hoik sax krai aux mhong:tix bawg gawhgrawng mawh maix pa ang kaux sijax, pa pie pa lhen: mai: pa vawk rhawm: ka piang ku ceu heue"

Sivai sang:si deeih ah nin: "paox grawm aux ang: tau tix ah lox yuh nin: ka aux, aux hoik tawng grawng nawh heue khaix an: sivai sang:si ghreu: sox praix to: khaing: dee ot tix heue. khaix an: sox praix baox hu: ka sivai mai: glaw: nyaw lox pa ang: nawh pa ang: meh kadaux sinax kiex ra: mu:, viangmawhnan, sivai ang yum rhawm: kah mai: sivai grheu: sox praix to: khaing: dee ot tix heue.

Yam deeih sipub sivai sang:si mai: sivai ka paox tix, sivai sang:si chawk yuh nin: "paoxgrawm eue: lox pa krai sox praix an: mawh ang: mawh lie. Sivai deeih pawk lox sivai sang:si ah nin:, paoxgrawm eue: paw nghiet ka lox glaw: pa nyaw ka daux sinax ax liak. Phan: ax ih rhawm: rhi: khri: mau paox tix, tom: sidah ju ax sax mawh krax pa mhawm: son ax leeeing ju leeing phan: heue. Khaix hoik sidex sivai sang:si ka sivai, kiex ra: mu: deeih ih rhawm: paox tix mai: deeih ot tau heue. Sox praix an: maw kheu: hoik tawng dee phit dee lud tix, nawh tom: yaox tix to: khaing: dee ot tix heue.

In singaix...
.keem chix tawng nang....sivai: dee lud tix ka piang krag lie?
tix mu kie nieh...keem chix cu nang ....lag kix been glaw: tix....kiex simah lie?

Aux ai rang....beuh....