 |
| Riang krax ot grawng koe vax hawt khix hawt num...hawt singaix cie vax |
Ceu pui vax ex kix tang koe nang khix num heue. Tom: ju tax, ju yiex pui vax ex kix dix, kix sidaing tawng kah grawhgrawng khix num in pa koe kadaux (1) num (12) khix, baux raux, rung, kuat, baux mawx baux ankix. Mawhkheu baux khix awx, pui caw tix yuh kaing ceu patix, pui caw tix sum: simie ceu patix, pui hoik tang tawng kah grawng ceu ankix bawg mawx bawg an, khix mawx khix an. Mawhkheu hoik chix hoik tawng tix tang chix yuh ka lai khix num.
Awm pa hoik chix keud pui Vax ju dix kix tix yuh ka lai khix num cie pui vax, can kawn pui pa ot ka piang haktiex in ku dah ku dee kix kawx, tom: baux rheng num mawx tix dix, pui kawx hoik dawg coca sau riang kah son sang keud tix yuh ka lai khix num in kix nang. Tom: kadaux ra: rheng num dix, pui Ijiptux kix, hoik dawg kaw tix jah yuh kah lai khix num in.
Viangmawhnan, baux yam an dix, son sang vais vid haktiex tix, tix glak kie nie, mawh caw tix rheeng ding mawx mai: tix ceu, sonsasng via haktiex tix vai vid kah singaix in nang tix glak, mawh caw tix uik bawgyam ding mawx an, cub kix pa koe pyina kadaux meung Ijiptux khankix, kix ang nyang pon twang tix keud sidawng mhawm mhawm. Mawhkheunan, daux lai khix num cie pui Ijiptux ankix lha khaing cie pui tix num, lha been 1 ngaix. Khaix hoik lih lai khix num cie pui Ijiptux kix tom: hoik rheeng num, pa mawh simiang Romax pa kaux Juliyiet Sisa (Julius Caseser) Nawh kawx baox deeh kaw tix yuh ka lai khix num pa nie khaw caw tix mu, viangmawhnan, lai khix num an kawx, daux tix num, nawh kawx kawn phai 12 mimit.
Baux khaix 1582 num tan: pa mawh simiang vad ting tix kaux pa kaux Garigori (Garigori) nawh kawx tat beeh glawm kaing pa sang yuh ka lai khix num in lih ka daux glawk pa khaw caw tix mu nang. Ceu pui pa koe pyina khankix, kix keud jee keud blaong mai: kix sawn grawng in mhawm sidawng khaix an kix hoik pon tat tix keud lih mawh lai khix num pa lih pui tix shiao tom: daux singaix yam in. (piang in kawx tix num kie nie, nawh kawx kawn caw tix phai 26 siex kaing:) Mawhkheunan, lai riang khix pa yip pa shiao pui ka piang beu ma in singaix, pui tom: ca sawn mawh yaog tix min simiang vad Pok Garirori an mai: pui tom: tat ceu kaux nawh mawh lai khix num Gregorian.
Lai khix num pa phaw pa keud kuad Vax
Lai khix num pa phaw pa keud kuad Vax ju dix kix tix yuh an, kix sawu tix shiao tosat 12 ceu tang singaix. 10 ngaix nawh koe tix vang tuah, 3 vang tuah nawh koe tix khix, 12 khix nawh koe 1 num. Kix een khix raoma mawh jhaong num, singaix pa pang khix mai: singaix pa yeet khix khankix kawx, hoik koe kadaux tix khix an. Sonsang pang khix tix bawg, viang nawh caw tix koe 15 ngaix kawx, son sang yeet khix tix bawg, nawh ang ot koe 15 ngaix. Bawgyam pa caw khix tix pang 15 ngaix mai: yam caw khix tix yeet nang kadaux 15 ngaix an, khix tix khix viang nawh koe 30 ngaix kawx, bawgyam pa caw khix tix pang: 15 ngaix mai: yam caw khix tix yeet 14 ngaix an, khix an tix khix nawh caw ngie tix koe 29 ngaix ngie.
Mawh jao in 4 num tix bawg, num tom: caw tix gap paoxtix. Num pa gap yuh nan kid nie, pui tom: ah num gap khix (phan ang mawh nan) pui ah num ting kah. Pui Vax kix ang tiem tix een num ka lai simin. Son num tix num, kix een ngie tix tawng kah tosat. Tosat koe 12 mu, nawh mawh nang son 12 num. Phan son tix num hoik, tosat nawh loh nang tix tix mu. Mawh kheu in pui Vax kix, pui simin ngie num khix singaix kah giien taix tix khaing.
Singaix 10 mu (10 ngaix)
1) Ka
2) Kap
3) Nap
4) Rai
5) Meung
6) Pleek
7) Kat
8) Khuat
9) Rong
10) Tao
Tosat 12 ceu
1) brung
2) pex
3) fax
4) ia:
5) sox
6) lig
7) kiang
8) moi
9) sivai
10) kang koi
11) siyawng
12) si uing
Pui teei singaix 10 ngaix mai: hu kab kah tosat 12 ceu, khaix an, pui vai vid nawh hu plud khaix paoxtix.
Jah tom: daux khix num: jah Vax pa koe daux lai khix num cie Vax pa ciang tix yaox tau mai: lai khix num pa yip pa shiao pui paing haktiex in.
1. Khix Gla ........... November / December
2. Khix Glim ........... December / January
3. Khix Grawn ........... January / February
4. Khix Gre ............ February / March
5. Khix Nai ............ March / April
6. Khix Jhai ............ April / May
7. Khix Mu ............ May / June
8. Khix Pai ............. June / July
9. Khix Sao ............. July / August
10. Khix Klah ............ August / September
11. Khix Peh ............ September / October
12. Khix Taing ............ October / November
Yam yuh pui kaing ma kaing kaung: khankix kawx, pui jhak pui sawn ngie kah piang khix num cie pui Vax pa koe kadaux lai khix num, khix mawx khix ankix. awm plak greem in ......
* Daux Khix Taing > > >
Pa mawh khix prim num prim in, pui Vax kix khoek heem ka tax kuad yiex kuad pa riex ju khankix mai: pui sawg tix cie kah buan son ceu pa mhawm khankix.
----------------------------------------------------------------------------------------------------------
* Daux Khix Gla > > >
Daux khix in, mawh khix num jah kadaux lai khix num cie pui Vax mai: khix Gla 1 ngaix kawx, nawh kawx mawh singaix num jah tix son kadaux tix num. Mawhkheunan, haok khix Gla 1 ngaix
( Khix 1-1 ngaix) an, nawh hoik caw nang tix mawh Num khraox pui Vax nang.
----------------------------------------------------------------------------------------------------------
* Daux Khix Glim & Khix Grawn > > >
Daux khix glim mai khix grawn in, pui kaong: tix cox tix ih rawng rawm mai: sonsang pon pui rawm, pui yuh kaing rawm daux khix in mai: krawg kawx pui caw tix saik daux khix in nang.
----------------------------------------------------------------------------------------------------------
* Daux Khix Gre > > >
Daux khix gre in, pui sum: tix cie nyiex khraox mai: soh tix ih ma, satix ih yeem.
----------------------------------------------------------------------------------------------------------
* Daux Khix Nai > > >
Daux khix nai in, pui keeig ma mai: kraik ma cie tix.
----------------------------------------------------------------------------------------------------------
* Daux Khix Jhai > > >
Daux khix jhai in, pui sum: simie mai: pui yuh poi rieb lhiex, phan hoek bawgyam jee khix tan:, pui vai kah moeg, sonsang mhawm to ma heue. Yam kawn kid pui kaing: gaing pui ngawg dix, haktiex pa kid kaing: khankix, khix in mawh khix sawg kix tix kid kaing:
----------------------------------------------------------------------------------------------------------
* Daux Khix Mu & Khix Pai > > >
Daux khix mu mai: khix pai in, pui riam rib ma tix mai: pui yuh poi hoh kah ceu pa caox pa caig, hoh kix lih khaing daux nyiex daux yaong tix.
----------------------------------------------------------------------------------------------------------
* Daux Khix Sao > > >
Daux khix sao in, sonsang ting pang lang lhax to ma, sonsang yaox to ma tix luad luan khaing can sim sai to tiag mai: kawng viang khankix, pui vai pui krub kah moeg pau gawng pau ma khankix. Haktiex dee kid kaing: dix kawx, khix in mawh nang khix baox deeh kid pui kaing: ra: bawg tix bawg.
----------------------------------------------------------------------------------------------------------
* Daux Khix Peh > > >
Daux khix peh in, mawh kheu hoik hoek to ma, kaux nghox khraox, pui kawx yuh caw nghox nang. Haok khix Peh 15 ngaix, mawh ngaix Kaing: nghox khraox pui Vax. Mawhkheu hoik dex yaox pui tix vawg nghox khraox, pui tom: yuh rhawm mhawm, rhawm sibieh tix tau, pui khrawm paox tix kadaux pa grum rhawm mai: yuh kah poi in. Khix Peh 15 ngaix in, hoik dawg mawh nang pui ju dix kix pa viex rhawm mhawm rhawm khaw tix tat pui cie kah.
> Singaix pang khix peh (15) ngaix in, nawh mawh singaix vaw bong nghox khraox Vax <
----------------------------------------------------------------------------------------------------------
Kapiang beu ma haktiex in, can pui ceu pa koe ka piang haktiex in ku dah ku dee, pui ceu mawx pui ceu an khankix, pa keud pa phaw pui tix yuh kah lai khix num cie pui ceu tix khankix an, pui teei ka khix num: jah an mai: pui sau nawh mawh num khraox cie pui ceu tix. Pui kawx yuh nang poi num khraox cie tix daux khix an. Can pui ceu pa koe lai khix num ka piang haktiex in, lheu khaing khix nom jah tix an, pui ang sax tiang tix yuh poi num khraox kadaux khix tang dah.
Awm an, lai khix num cie ex pui Vax kawx, tix num in koe 12 khix, khix num: jah kawx, nawh caw tix mawh khix Gla mai: khix pa ghoik num kieh nie, nawh tom: caw tix mawh khix Taing khix 12 heue. Been pa mhawm cie pui Vax tix ceu, phan hoek bawgyam singaix uik khix Taing, pui sawg tix khoek heem ka tax kuad yiex kuad, pui pa riex ju khankix mai: pui sitaux kaing: kix, khaix an pui loh kix ih kraung khraox kraung paing, lheu khaing an, pui sawg tix pih ping nyiex ping yaong, caw tix yuh singax singeh. Been pa mhawm in tix ceu kie nie, dee bleeh nawh mawh kheu can ceu pa seeing pa brai pa hoik lud yuh pui daux num pa prim in khankix, ang pui lai viex nawh hu ka daux num pa khraox mai: can ceu pa ang mhawm pa dawg koe tom: kadaux num pa prim in, kieh nawh luan mai: num pa prim mai: kieh nawh uik kadaux pa prim, in mawh dee bleeh yuh nan heue. Khix in mawh khix num: jah kadaux lai khix num cie pui Vax. Khix Gla pa jah tix haok 1 ngaix an, nawh mawh ngaix num: jah kdaux num pa khraox pa ngha. Mawh kheu singaix an, kdaux lai khix num cie pui Vax, nawh kawx caw nang tix mawh singaix num: jah kadaux num pa khraox.
Daux lai khix num cie pui Vax, khix pa caw num tix khraox, mawh khix num: jah pa mawh khix Gla an. Pa mawh ngaix num: jah daux khix Gla (haok khix Gla 1 ngaix) an kawx nawh mawh singaix num: jah num son pui Vax 1 ngaix heue. Mawh kheunan, khix Gla 1 ngaix (khix 1 - 1 ngaix) in, nawh caw tix mawh........Singaix num Khraox Vax)
Tax du yiex die ceu pui Vax kix dix, viang kix ang nyang bax grum naog kadaux krax pa chix pa tawng kawn pui khankix kawx, daux num in 1 num, khix mawx khix an, caw tix yuh patix, caw tix sum: ceu patix, can ceu in khankix, kix hoik tang chix guah tix tawng laoh laoh lie lie, kaux kaux cong cong mai: kix hoik pon tat tix sau kadaux lai khix num cie pui Vax sidawng lhaing lhaing. In tix ceu nang nawh hoik mawh jhawm pa daux pa am ex kah grawng lai khix num cie pui Vax in tix mu kheu.
No comments :
Post a Comment
Prah Een Lox