BEEN DAWT MEUNG KENG TUNG

BEEN DAWT MEUNG KENG TUNG (Veng Kaung Dung)

       Grawg been sikang: cing: tung Daux cing tung “GONG”(Siiem:tix ceu)mai: Siiem:viang kix sitoe: tix ting lhaong: ka kaux viang mawh kawx nan: kix ang: tie mawh cub pui pa jah tix kaw: kah cing: tung heue. Pui pa jah tix hoek kaing: cub kaing: phung: daux cing: tung mawh cub pui “LUAX” pa mawh duih ceu “MONG KHA MA” pa hoik ot voe pui tang: ceu heue. Ex kawn: “LUAX” khaoh khaing: piang gawng piang lua mai: daux tong daux ce plak klip singaix hak tiex hawx heue.

       Num khrit AD 1134-1229 num, kaw: tix sum: nyiiex yaong: daux hak tiex dee kok ceu kaux mawh “Veng Ciao:” heue. Yam an: Siiem: kix ot hak tiex Thai mai: priaix plak lih singaix rawm: krong kawx, Viang mawh kawx nin: ang: kix tie nyiang ting riang ting rao khawm: ot kix praix an: heue. “LUAX”pa jah tix kaw: “Veng Ciao:” kix yaog “MANG YOI” mawh Simiang tix heue. Kix kok hak tiex ot tix mawh “DANGMIX LAX” heue.

       Num khrit AD 1200 num haoh Simiang ceu pui “Yong”pra: “Mang Rai” Ciao: pa giex kuang: “Cing: Rai” nawh kieh kawn: Ai tix “Khun Kaong:” puing Meung “DANGMIX LAX” pa kok ceu kaux mawh “Veng Ciao:” heue. Viang mawh kawx nan: kix ang: pex ang: pon kah, Bawg ra: nawh deeih ploi: kawn: Nyi tix pa kaux “ Khun Lang” baoh hu: puing: heue. Viang “Yung” puing: kawx ra: bawg yuh nin: kix ka ang: pex ang: pon ka heue. “Yong” viang puing: ra: bawg yuh nin: jao ang: kix pex, “Pra: Mang:Rai” tom: ploi: pux Aik ra: kaux pa mawh Mang khun mai: Mang khen ceu pui Luax, pa ot daux meu praix “Yung” daux Loi tong viex khawm: kawn moeng tix, simoh yix Simiang “Yung” paox tix yiiex tom: to: tix hoe hot mai: maix kix ah ka Simiang Luax pa mawh “Tax Mang Yoi” Tax Mang Yoi yum rhawm ka lox krai kiex, mai: tawx dee ot son kiex mai: kieh kiex yuh Ciao: kaing: naing tix heue. Khaix hoik koe: dex loe: num haoh, Simiang “Yung” Pra: Mang Rai baoh hu: puing: Meung “LUAX” bawg loe:, pux aik an: kiex Ra: kaux Ciao: pa yuh pui jiang (Theux Vu)son simiang yung kiex yuh tix thong: kru naing “LUAX” kuan tix Riep pui: ka kru naing “Yung” te te kiex ot plak “Yung” deeih puing: kru naing “LUAX” yam an: kix giex ka simiang Luax Tax Mang Yoi ang: lai tawx nawh yuh simiang Luax heue.

      Simiang “Yung” son sang ang: Luax lai deeih pheen deeih puing: ka kix, kix kieh “Luax” ah lox jhah lox pih(sijah mu kheu) khaix an: “Yung”grheu: ceu pui “Luax” haok ot piang gawng piang lua plak krax lih singaix cing tung heue. “Yung” Viex jung pui khawm: Lhang: nyiiex tom: haoh tom: nie hoek ot Meung “DANG MI XLAX” mai: kaw: Meung khraox hak tiex khraox tan: heue. Meung khraox haktiex khraox an: pra: “Mang Rai:” kieh Mang khun pa mawh ceu “LUAX” sum: nyiiex haw: mai: kieh nawh yuh Simiang, AD num khrit 1243 num, nawh jah tix mawh simiang Nab bat (1)mai: sum: nyiiex haw: heue.

      Jah singaix an: “Veng Ciao:” Luax pa ot Meung “DANG MIX LAX” tom: kok ceu kaux meung an: kaux “KHE MA RAX THAX TONG KAX PU RI” heue. “KHE MA RAX THAX TONG KAX PU RI” dee bleeh mawh Meung pa ang: krax khi: krax glawh lai koe:.

Pa tiiem U Myix been sigang: man.

1961-10-19

CING: TUNG SIGANG LIH.

      Phan: mawh been sigang: Cing: tung kie nie, jah (1229)num, mawh “LUAX ciao: giex ciao: kuang: mai: ting lhaong: ka dee an:, AD 1243 num, laig daux tawm: taix “GONG” heue. Viang kix simiang pa sitoe: tix kuang: hoek tom: yam in: kawx jah tix daux AD 1253 num heue. Mawh kheu: nan: glhawng: daux ceu pa kok ceu mawh “Cing: tung” AD khrawm num kao: yiieh Ceu kawn: pui “GONG” hoek ang: jud ang: jai kawx, “LUAX” kawn: ca: mawh pot pa ting kah glhawng: ce in: heue. AD 1557 num laig daux tawm: taix Man heue. Hak tiex dee giex kuang: Cing: tung mawh Sinax KHRAWNG mai: KRONG heue. Hak tiex Cing: tung jah AD kao: tom: hoek kao: ra: mawh “LUAX” pa ting daux heue.

      Pa ah ex haktiex Cing: tung, dix mawh dee caux, dee dung rawm: kawn: pui ang: doh ot ka heue. Ceu pui Vax hoek tan: paoh rawng lih rawm: an: kieh haktiex an: kroh, khaix an: pui tom: tag pon tix ot dee an: heue. Tax simiang “VAX” pa kaux “LUNG KAW” nawh mhaing: tix moeng yax moeng simiang “GONG” mai: tiiem lai hu: ka kiex heue. Jaoh mawh Tax “Lung Kaw” simiang pa kied ting siawb sibrawm nawh pua: lai mai: lawm pliah, pon puah hoek ka yax simiang “GONG” viang kiex ang: muih ka Txax “Lung Kaw” kawx kiex ang: hat tix thiang, ka lox mhaing: Tax “Lung Kaw” tix moeng tix, mawh kheu: nan: kiex tom yuh cu:yi: tix ceu heue. Daux yam in: kawn: kied iak kawn: aux heue. Lai son deeh pawk lox hoek khawm: lag sawng yax an: kiex khrex ka, lag sawng an: mawh mhok khri:, ka daux mhok khri: an: yax an: teei dai: kie kiex tix mai: sau: daux mhok an:, yuh yax an: nin: mawh sang kieh kiex siawp sibrawm Tax Vax ceet grai: heue.

      Khaix gheung: ra: num yax simiang an: ploi: kawn: tix ra: kaux puing: ka simiang “Vax” dee an: kix kok ceu mawh “La Vax pon” heue. Tom: yam an: “ Vax” kawn: ting lhaong giex kuang: pot daux glhawng: daux ce Cing: tung heue.

Pa maok khax dawk teu tang: tun

Been sigang: sut ku hak tiex .

CEU KAWN: PUI PA JAH TIX HOEK MEUNG MAN.

(1) ceu pui sa long.

(2) Ceu pui Ma le:.

CEU PUI PA HAWT KHAIX KIX.

(1) Vax

(2) Palawng.

(3) Mon.

Kix ot plak chaw: Meung Man praix mit Wax cun: paw mai: taning: ta yi heue.

Cub haw: kham: pa jah tix koe: haktiex Man

“Vax” Mon, pa lawng.

(1) Tax thong “Sang thong”

(2) Ceu pui “TIEX” ting toi: pa kok ceu mawh “Tax Kawng”

(3) Ceu pui “Piu” Ta ye khet ta ya.

Been kaw: sang ka Veng Cing: tung,

Veng Cing: tung, kaw: sang tix mai: siviex pa mox khan: kix heue. O Veng “Tab via Veng” krax lang: tix plak koe: (4)lhak, plak dex koe: (5) lhak heue.

SIVIEX VENG -

(1) Siviex Nawng Pha(kawn koe: yam in)

(2) Ceng lek.

(3) Yang kham:.

(4) Pa liang (kawn koe:)

(5) Ceng lan:.

(6) Ngam phax.

(7) Phax yang.

(8) Cai: Meung.

(9) Kaix haix.

(10) Yang Peung.

(11) yang kong:.

(12) Ming ka la.

Majer scott off the Shan hill.

Dee jah ex tix ot

(1) Veng Vax Meung cem-krax hu: Ta chi lek.

(2) Veng Vax- krax yaong kat thai:.

Dee niet – Cao seh lai Tax Ngox Kat, Num Pang ting kaing, Weng Pang sang, haktiex vax

Cao: Baox ploi haok piang bhaung (Ai Rang)