Been dawd

Grawng Ju Tax Vad, Bhadanta Vicinta, Saddhamma jotika, dhaja

Nyiex Cawng, ratana siddhi, Yaong Daux Luix

Veng Mang Shiang, Haktiex Vax.

1. Nawh Keh Num Ko Ja = 1316 Mu,  Num Sasana = 2479 Va, Jee Khix Taing (13) Sawm, Ngaix Ka, Plak Ngawb (9) Taix.

(K). Keeing = Tax Loi Cin Cam

(Kh). Miex = Yex Loi Lu

(G). O Nawh Koe (2) kaux, Mawh Yiex Mon Mai: I Soe.

(Ng). Aik = Ai Awng, Pux Bun = Am Li, Pux Simex = Ngox The

Pux Aik Koe (6) Kaux, Khawmuik Heue...

Nawh Keh Yaong Kawn Klang Mai Ot Tan (13) Num, Mawh Num Koja, 1329 Mu, Ayu Asak Ju Nawh Naog (13). Daux Khix Jhai Nawh Caw Tix Rawg Mhaing A Khuang Ka Miex Keeing Pa Ting Buan Nie Son Khawm Kaux, Son-sang Hoak Laig Daux Sasana, Yuh Tix Mawh Kap Pi, Yuh Pui Hawt Tax Vad Ting Usidham, Nyiex Cawng Vat Man Tham.

  

2. Num Koja 1330 Mu, Num Sasana 2512 Va, Ngaix Rong Pa Mawh Miex Keeing Cao Buan Son Nawh Rakaux Mai Tax Mawk Kham, Ot Yaong Man Tham, Kix Yuh Timawh, Cao Dana Pacci (4) Ceu Tom Yaog Yaw Ceep Kham Tawx Nawh Mawh Ca Ho, Samane, Daux Nyiex Cawng Vad Taoh Reux, Sra UpaJie Nawh Mawh, Tax Vad Usidham, Nyiex Cawng Man Tham,  Sum Ceukaux Nawh Mawh Caho, Vicinta.

3. Hoek Num Koja 1331 Mu, Pa Mawh Keeing Nawh, Glib Ngai Uik Ju Yum Hu, Khaing Kix Heue. Khaix An: Nawh Tang Baox Toe Ju Tix Yuh Pui Hawt Usidham Daux Nyiex Cawng Man Tham, Paox (2) Va, Mai: Ha Naog Ot Nawh Tau Tan (2) Num An:, Pa Mawh Tax Vad Ting, Usidham Baox Glib Ngai Uik Ju, Luan Hu Khaing Kix. 

Hoek Daux Num Koja 1333 Mu An: Kawx Nawh Kawn Baox Hawt Yuh Pui Hawt (Tapie) Tax Vad Uvicinta, Daux Nyiex  Cawng Man Tham Baox (2) Va.

Hoek Daux Num Koja 1336 Mu, Mawhkheu Caw Nyiex Yaong Tix  Rhoi Tax Vad Vilinda, Pa Ot Nyiex Cawng Taoh Me: Yaox Tix Tux Do Tix Hu Ot Nyiex Cawng Man Tha (1) Va.

Khaix An:, Pa Mawh Kuad Nyiex, Miex Yaong Taoh Me: Khankix, angkoe Dee Gauxrhawm Khawrhi, Jao Pon Nyiex Vad Kix Tix Riem Pui Ngawm Nyiex Vad, Ca (2) Va Heue. Kiehmawhnan, Kix Tom Cu Baox Tix Baox Hu Niman;Kok Tax Vad Uvilinda Deeih Ing Ot Daux Nyiex Cawng Taoh Me:

Phao Deeih Ing Tax Vad Vilinda An:, Nawh Tang Kok; Viex Pa Mawh Caho, Vicinta In Hawt Tix, Son-sang Jhak Kia Ngian Tix Mai Yuh (Tapie), Yuh Nin Tom Hoek Daux Nyiex Vad Taoh Mee Dutiya Haok Khix Pai (14) Sawm.

Num Koja 1337 Mu, Num Sasana 2519 Va, Jee Khix Taing (12) Sawm, Caw Ngaix Kat, Pa Mawh Tax Khun Sang Mai: Yiex Loi Awng, Daux Yaong Motiox Kix Khawm Nyiex Khawm Ma, Rieb Mawh Cao Dana Kraung Pacce (4) Ceu Kah Yaog Yaw Ghaok Tawx Ceep In Caho Vicinta, Laig Mawh Bha (rahan), Kadaux Sim Nyiex Cawng Pa Ang:, Upajjie Sra Dex To, Nawh Mawh Tax Vad Usijen Cawng Pa Ang:.

Num Koja 1338 Mu, Tom Mhaing A Khuang Kah Tax Sra Tix Pa Mawh Tax Vad Uvilinda An:, Son-sang Hu Sawg Tix Gau Teei Pinnya Lhak Haing Grawng Dhamma Tra Ka Tax Vad Uacinna Daux Nyiex Cawng Awng Mye Je Ya, Veng Me Myox, Rheeng (5) Num.

Num Koja 1334 Mu, Nawh Ing Fi Krax Miex Tix, Khawm Hoek Daux Nyiex Cawng Taoh Mee, Tan Kieh Nieh, Ca Cub Pa Mawh Saddha Kuad Nyiex Miex Yaong Kix Yaong Taoh Mee, Grum Rieb Hoek Nawh Khawm Niman Hai Nawh Cao Ot Daux Nyiex Cawng Taoh Mee Tan: Hoek Tom Yam In Heue....

Num Koja 1345 In Caw Timawh Num Ang Khaw Son Jao Glib Ngai Grai Hu Uik Ju, Miex Nawh Khaing Nawh Kawx Heue.

Laig Yuh Kaing Sangha

Num Koja 1346 Mu, Cubcaw Sangha Haktiex Vax Mai: Tax Vad Ting Bhaddanta Vannadhaja (Tax Kat), Nyiex Vad Gau Lai Plak Been Buddha, Veluvan Kah Hoik Yaox Mawh Pui Cheung Lhak Haing Tikaux, Mawhkheunan, Tom Yaog Ghaok Ap Tawx Nawh Mawh Pui Mhai Cang Plak Li Vad Haktiex Vax Koe (12) Num, Kadaux Num Ankix, Nawh Kah Daing Yuh Kaing Sawg Siad Tix Jhi Tawx Grawhgrawng Li Vad, Bak Tix Viex Rieb Pui Can Pa Ang Nyang Yi:, Been Buddha....Cu Rieb Laig Plaig Tawx Kix Daux Li Phra Pa Mawh Sasana Buddha Gautama Pa Yi: Ex Phao In, In: Kapiang Haktiex Vax Pie Pon Yuh Tix Heue.

Hoek Num Koja 1351 Mu, Pa Mawh Sra Ting Nawh, Tax Vad Vilinda Nyiex Cawng Taoh Mee, Glib Ngai Grai Hu Uik Ju, Khaing Kix Khaix An:,  Cubcaw Sangha Haktiex Vax Mai Pui Haoh Pui Hun, Kuad Nyiex Miex Yaong Nyiex Cawng Taoh Mee Tom Ap Tix Tawx Nawh Mawh Cao Jhawp Kaing Krox Nyiex Vad Taoh Mee Pa Koe Prauk Sam Ceng Rheeng (4) Num.

Hoek Daux Num Koja 1354 Mu, Nawh Baox Tux Tix Hu Yuh Dah Dee Ot Koe Pa Mawh Nyiex Cawng Sang Kham Ka, Yaong Khan Daux Luix, Khaix An: Kieh Nieh Kadaux Num Koja 1355 Mu, Jah Tix Sum Nyiex Cawng Khraox Yuh Hoek 1356, Tawx Dan Raug Rawm Rieb Buan Grum Hoik Mhawm Naog Uik Heue.

Num Koja 1357 Mu An:, Mawh Kheu Ang Sang Kieh Sasana Grai, Ca Cub Kawn Rai, Pui Yaong Plak Pa Leen Kix Tom Khrawm Paoxtix Grawhgrawng Simie Tix Baox Sum Nyiex Vad Khraox Mai: Tog Thong PaoxTix Hu Mhaing Pui Krox (Ngawm;Pau;Kuang) Nyiex Vad, Nawh Tang Keud Son Sivoe Ngai Sasana Tom Kieh Pa Mawh Bha Narata Mai: Caho (3) Kaux Haok Tangto (Tai Phiaox) Cao Tix Ngawm, Hoek Tom Yamin.

Num Koja 1358 Mu, Ca Cubcaw Sang Mai Cub Plak Been Vad Haktiex Man Rang Kuang Yaog Yaw Ap Tawx Nawh Yuh Siang Cang (Ukkatha) Sangha Nayaka Plak Haktiex Vax Rheeng (4) Num.

Yam Hoek 1359 Mu, Pui Yaong Ho Ngieng Kix Simie Sum Nyiex Cawng Khraox Mai Thong Paoxtix Hu Mhaing Lox Sonsang Rieb Kix Laig Ih Been Buddha; Li Vad, Tan Kie Nieh Nawh Tang Deeih Teei Tawx Pa Mawh Bha Sumana Mai Caho (5) Pa:/Kaux Hu Tang To Tix Ngawm Nyiex Vad Ho Ngieng.

Ca Hawt Ka Been Cub Vad Plak CingTung, Pa Mawh Cai: Soe Cub Lien Shiam, Ot Yaong Son Mawn:, Cu Rieb Tix Yuh Nom Cao Dana, Sonsang Liang Tix Yaog Yaw Ghaok Nawh Mawh Bha Swati, Kadaux Poi Raug Rawm Nyiex Vad Khroax (418), Pangsang, Haktiex Vax.

Lheu Khaing An:, Khaix Ha Hoik Mhawm Mawh Bha Swati An:, Pa Mawh Cai: Soe Awng, Ot Yaong Van Nawng, Kaviang, Tom Baox Rieb Timawh Cao Dana Kraung  Vad (4) Ceu Sonsang Baox Yaog Yaw Ghaok Nawh Haok Mawh Bha Swami, Kadaux Poi Raug Rawm, Nyiex Vad Khraox Ka Viang Heue.

Num Koja 1365 Mu, Ot Greem  Kaing Tog Thong Pa Mawh Tax Vad Ting Bhaddanta Vandhaja, Nyiex Vad Veluvan, Tanyan, Son Hu Tat Tig Vud Tawx, Krax Yi: Lud (Miccha dhithi), Daux Shiang Mee Plong, Pa Koe (8) Yaong Awm Plak Greem Inkix.

1. Yaong Rong

2. Yaong Mo cet

3. Yaong Gawng Tax

4. Yaong Ka Ceen

5. Yaong Plong

6. Yaong Ka Ceen Prim

7. Yaong Nao

8. Yaong Kawn Lieng

Lhang Nyiex Koe (318), Simex Koe (1037) Kaux, Sibun Koe (1214) Kaux, Kleg Koe (2251) Kaux Khawmuik.

1369 Mawh Num Hu Yuh Nyiex Cawng Khrox Yoang Nex Mai Mawh Num Pon Nawh Tix Hu Rieb Nawh CeuKaux; Plah Lai Yuh Kaing Plak Been Vad Pa Mawh “Saddhamma jotikadhaja” Dah Dee Kamba E:, Rangkuang, Meung Robrom Man. 

Kaoh Khaing Tan:, Nawh Deeih Ing Dah Dee Ot Tix, Yam Hoek Nawh Dee ot Tix Caw Jee Khix Gre (8) Sawm, Pa Mawh Tax Kuad Thun Mai: Yex Cum Tau Mai Pui Haoh Pui Hun Yaong Daux Luix, Tag Deeih Rieb Mhawm Nyawm Rhawm Yaog Yaw Baox Tawx Ghaok Kaing (Thap Kam) Jah Num Koja 1370 Mu, Nawh Tog Thong Kawn Rai Pui Yaong Kix Daux Luix Baoh Nyiex Gau Lai, Plak Man Hoek Tom Phao In.

1372 Mu, Mawh Num Rieb Nawh Tix Plaig Tawx Pui Yaong Pang Kwi, Chi Pang Yang Kix Laig Ih Been Phra Ca Lhang Nyiex (14), Kawn Pui (65) Kaux.

1373 Mu, Nawh Cao Hu Tog Thong Yuh Tawx Nyiex Vad Khraox Daux Rawb Rheem Pang Yang, Haktiex Vax Ankix.

1374 Mu, Awm Hawt Beeih Glawm Tax Vad Yuh Kaing Plak Li Vad Tikaux Mai Ot Mai Rhawm Simie Kawn Rai Pui Yaong Kix, Kie Nieh...Yam Hoek Bawgyam Timu An:, Pa Mawh Cub Pui Yaong Pha Tang, Chi, Luix Dung Noh (Nawng Khet), Kix Ca (64) Lhang Nyiex, Simex (101) Kaux; Sibun (175)Kaux; Kieh Kleuk Khawm Uik Koe (276) Kaux. Rieb Tix Laig Ih Been Phra/Buddha, Greem Tog Thong Jhi Tawx Nawh, Khaix an:, Pa Mawh Nyiex Vad Khraox Kawx Bak Tix Yuh Kheu Tawx Cao Dana Pa Mawh Tax Kuad Kaw Mai Yex Awng, Ot Yaong Pa Leen Kix Dan Mau Hawx (500000). Pon Tix Hoik Yuh Nyiex Vad Khraox Hoik Daux Pang Khix Jhai Kah Yaox Tix Haok Nyiex Vad Khraox Heue.

1375 Mu, Jee Khix Taing (1) Sawm, Pa Mawh Tax Kuad Thun Khawm Nyiex Ma Mai: Pui Haoh Pui Hun, Yaong Daux Luix Kix Kah Grum Rhawm Tog Thong Paoxtix, Yaog Yaw Ghaok Siawp Sibrawm, (Thap Kam), Hoek Pang Khix Gre, Kie Nieh Tom Raug Rawm Nyiex Vad Khraox Rieb Buan Son, Tau Mai Jao Grum Naog Kheu Hoik Mhawm Uik Hoik Krax Hoik Grawng Heue.

Been Dawt Tax Vad Vicinda Ex Pa Ot, Yaong Daux Luix, Nyiex Vad Taoh Mee In...Khaw Tix Kawn Cud Lud, Viang Ang Nyang Mhawm Sidawng Kawx, Aux Ha Hoik Doh Rhawm Ka Caw Timawh Pa Koe Son Nie Buan Timu Jao Mawh Plak Lai Ex Vax Awx, Mawhkheunan, Sin Pex Chix Yung Awm Krax Keud Aux Pui Cox Tix Pawd Rhuad..Tawx In Sipie, Sipie Kie Nieh.

An: Ha Hoik Mawh Pa Caw Tix Rug Viex Buan Son....Sinax Ex Hu Sivoe....

Sadhu---Sadhau---Sadhu

Mhawm --- Mhawm--Mhawm

Phan Yung Dhamma, Mawh Pa Daing Mhawm

Rhawm Doh Dhamma, Mawh Rhawm Rug Mhawm

Phan Yuh Krax Caw, Rug Sidaing Grum Naog

Kieh Lih Praix Krax Caw, Rug Sidaing Saig Yaox.

Lox khio khaw, kadaux lai been dawd tax vad taoh mee in, kieh koe pa cud pa ang nyang sidawng,,..yuh buan son cox tawx liak....ang tie nyang sawn tix mawh pa ha hoik, ca kawn pawd aux tix rhuad sonsang nie yaox pui khankix mai deeh teem aux cox....sigrah dee ang nyang viex kaing ting ceu pa yuh cao heue...

Mawhkheunan...bre pex tawng kukaux,....sonsang timawh phuk lai mhawm timu an....aux ca simie koe kapiang krax pa cox khre pex paox grawm tix tawx...awx...

Pui pawd tix rhuad mawh ai-vax